"Мы не пойдзем на Бангалор. Шэсце плануецца ад Акадэміі навук да Чарнобыльскай капліцы на вуліцы Карастаянавай. Гэты маршрут з`яўляецца асноўным для "Чарнобыльскага шляху", – заявіў 24 красавіка на паседжанні аргкамітэта мерапрыемства адзін з яго сябраў Віктар Івашкевіч.

Па яго словах, каля Чарнобыльскай капліцы плануецца правесці 21 хвіліну маўчання – у памяць 21-ай гадавіны чарнобыльскай трагедыі. "У беларускім Інтэрнэце ходзіць шмат чутак пра тое, што нам прапаноўваюць ісці на плошчу Бангалор. Але мы туды ісці не збіраемся, мы пойдзем да Чарнобыльскай капліцы. І я заклікаю неабыякавых людзей прынесці з сабою свечкі, каб запаліць іх у памяць пра тых, хто загінуў ад чарнобыльскай катастрофы", – сказаў В.Івашкевіч.

Па словах аднаго з заяўнікаў акцыі Аляксея Янукевіча, ужо пачаліся прэвентыўныя затрыманні патэнцыйных удзельнікаў акцыі. Так, учора ў Менску быў затрыманы моладзевы актывіст Андрэй Ігнатовіч. Яго затрымалі за распаўсюджванне налепак з заклікам узяць удзел у "Чарнобыльскім шляху", паведамляе БелаПАН.

А.Янукевіч таксама паведаміў, што 23 красавіка арганізатары акцыі абскардзілі рашэнне Менгарвыканкама, які змяніў маршрут "Чарнобыльскага шляху". "Пазапраўна парушаныя нашы асноўныя правы, гарантаваныя Канстытуцыяй, – права на свабоду сходаў. Таму сёння мы чакаем адказу з суду Маскоўскага раёна Менска. Яны павінны адмяніць рашэнне Менгарвыканкама аб змене нам маршруту шэсця", – лічыць А.Янукевіч.